​

HEYSTSKEIÐIÐ

Á heystskeiðnum ber til at velja ímillum tvær høvuðsgreinar, sum ávíkavist eru myndlist og palllist. Fyrsta mánaðin hava øll møguleika at royna seg innan allar lærugreinar, sum eitt nú fevna um sjónleik, dans, storytelling, tekning, linoliumsprent, smíð, street-art, kreativa skriving og máling. Eftir at hava roynt lærugreinarnar, velir tú, um tú ynskir at hava fleiri tímar í annaðhvørt myndlist ella palllist. Tú fært tó framhaldandi tímar í øllum fakunum gjøgnum alt námshálvárið. Hvønn mikudag fara vit út úr húsinum og hyggja nærri at samfelagnum og náttúruni rundan um okkum. 

​

Á heystskránni eru somuleiðis temavikur við gestalærarum. Dømi um tema kann vera filmur, fjølmiðlar, dansur, fotografi, glaslist ella leir. Á undanfarnum temavikum hava millum annað Andreas Høgenni, Trygvi Danielsen, Rakel Helmsdal og Rigmor Dam verið gestalærarar.

​

Í ár verða námsferðir til eitt nú Nólsoyar, Norðoyggjar, Suðuroyar umframt til slakt, ymisk virki og út í náttúruna.

​

Sum næmingur á heystskeiðnum 2021 kanst tú gleða teg til eitt halvt ár, ið er pakkað við áhugaverdum útferðum, spennandi listarligum avbjóðingum og ikki minst møguleikanum at møta nýggjum fólkum.

​

​

HVØR

Øll yvir 16 ár kunnu melda seg til heystskeiðið.

​

Á Háskúlanum eru ongar royndir, og sostatt eingin prógvhandan. Háskúlamánaðirnir eru ætlaðir sum eitt andarúm frá strembanini eftir úrsliti. Seks mánaðir, har tú kanst fordjúpa teg og veksa sum menniskja í góðum felagskapi við øðrum, sum ynskja tað sama.

 

​

PRÍSUR

Skeiðið kostar 3950 kr. um mánaðin. Í prísinum er íroknað gisting, 3 máltíðir um dagin, útferðir, tilfar, undirvísing og atgongd til listasøvn v.m. Tú avger sjálv/ur, um tú ynskir at gjalda mánaðarliga ella í einum.

 

​